Berita

Assalamu’alaikum Warohmatullohi Wabarokaatuh

Sampurasun....

Girang pangajén hormateun simkuring, Bapak kalih Ibu guru Pangaping hormateun simkuring, ogé para pamilon pasanggiri biantara anu ku simkuring dipikareueus.

Muji syukur kanu Agung anu sipat rohman rohim, mugi Gusti ngaijabah kana pamaksadan urang sadaya. Gusti nu parantos nakdirkeun urang sadaya tiasa patepung lawung paamprok jonghok di ieu patempatan kalayan sehat wal afiat. Salam sembah kahaturkeun ka jungjunan Robul gopur, ka Nabi anu terakhir nu kalebet Ulul Azmi, nyatana habibana wa maulana Muhammad SAW.  natrat ka para kulawargana, para shohabatna, teu kakantun kasadaya nu linuhung, mugi-mugi aranjeuna aya dina rohmat Gusti.  Amin YRA… .  

Hadirin anu ku simkuring dipihormat,

Sateuacana hapunten anu kasuhun bilih kirang tata krama, maklum abdi nu ti kampung, keuna ku paribasa laur kampung, geulis sisi, sonagar desa. Para hadirin anu sarumping, dina kasempetan anu kalintang saéna ieu, abdi seja medar perkawis “Hormat Tilawat ka Indung Bapa”. Salapan bulan urang dikandung, indung teu ngarasula, sabar lillahita’ala. Gubrag na urang kadunya tarohana nyawa. Indung nu parantos ngalakukeun 6 (genep) N keur urang. Terang naon eta 6 N teh? 6 N teh nyaeta: ngandung, ngalahirkeun, nganyusuan, ngarawat, ngagedekeun, sareng ngadidik urang salaku anakna.

Pon kitu deui nu jadi bapa, teu sirikna suku dijieun hulu, hulu dijieun suku. Dug hulu pet nyawa, pikeun ngabahagiakeun urang nu jadi anakna. Pikeun melaan anakna supaya ilahar jeung batur boh dina pakean atanapi nu sanesna.    

Hadirin anu ku simkuring dipihormat,

Harta banda nu ngaleuya, salieuk sagala aya, moal mahi pikeun urang mulang tarima ka indung reujeung ka bapa. Iwal ti hormat tilawat ka indung reujeung ka bapa, ngageunahkeun pikiranana, teu ngarobeda hatena, InsyaAllah kolot urang bakal bungaheun sarta bakal ngadokaeun urang sangkan bagja tur salamet dunya akherat. Inget, ridona Allah nyaeta  ridona kolot urang, murkana Allah nyaeta murkana kolot urang oge. Ulah sok munjung ka gunung, ulah muja kasagara. Munjung mah kudu ka indung, muja mah kudu ka bapa.

Ayeuna urang nuju sakola, tingalikeun ka indung bapa yen urang soson-soson dina diajarna, rengkak paripolah urang anu saluyu jeung aturan agama jeung darigamana. Tangtos hal eta anu dipiharep ku kolot urang sadaya.

Hadirin anu ku simkuring dipihormat,

Cindekna mah  indung tunggul rahayu, bapa tangkal darajat. Lamun urang hayang hirup waluya, salamet dunya akherat kudu jadi anak anu ngabakti ka kolot bari ngadoakeun. Ulah jadi anak anu doraka ka kolot. Nyuhunkeun dihapunten tina sagala kalepatan urang. Ku keclakna cipanon indung jeung bapa InsyaAllah sagala pamaksadan diijabah.

Sakitu anu kapihatur, boh bilih langkung saur bahe carek, bobo sapanon, carang sapakan, hapunten anu kasuhun. Mugia sanaos mung alakadarna, aya mangpaatna kanggo urang sadayana.

Wabillahi taufiq wal hidayah

Wassalamu’alaikum Warohmatullohi Wabarokaatuh

Kenging : Bowo Hadi Kuswono